انا اللى استــاهل ...كل اللى يجرالى







سلام عليكمـــ

أضحــاكم  سعيد  أعاده الله علينا و على اوطاننا بالخير والامن و السلام






أنا عندى انفلوانـــــزا

طيب ما عادى ايه الجديد ؟
ما طول عمرى مناعتى ضعيفة للانفلوانزا بالذات



لا بس المرة دى الدور قوى اوى
وبدون مقدمات



ببساطة كنت فى الشغل و سليمة جدا من الساعة 8
الساعة 10 بالظبط .....صوتى اختفى



اه والله اختفاء مفاجئ و مرعب



حتى الموجودين لاحظوا و قلقوا عليا

المهم



ولأنى بطبعى مش ( بأكبر الحكاية )  و انا راجعة ع البيت اشتريت تشكيلة ادوية متعودة عليها


دخلت بيتنا فى صمت غير معهود لا سلام ولا كلام 

اخدت كل الادوية اللى اشتريتها و شربت شاى

شوية والاقى الدنيا بتتأرجح

اتارى حرارتى ارتفعت  و الموضوع كبر









المهم اتحسنت بفضل الله

ولكن طول الوقت بافكر فى السبب

يعنى انا بدأت طقوس الشتاء من زمان اشمعنى دلوقتى اتعب !!!!

لحد ما اكتشفت السبب :/










انا السببـــ







ايوة انا مفيش غيرى


ليه بقى ؟




نرجع بالذاكرة لأول الاسبوع




كان لازم اقابل شخص ما مسئول فى الشغل علشان انهى مصالح
  على الرغم من انه من اسباب النكد الدائم المستمر فى حياتى


روحت له الاحد ماجاش
الاثنين ماجاش



الثلاثاء قفشته لحظات




كان واضح عليه الاعيــاء و ان الانفلوانزا قاتلاه بجد

انا : صباح الخير يا فندم

هو : صباح الخير اتفضلى

انا : خير يا فندم حضرتك غايب يومين ليه ؟

هو :  دور برد فظيع والله
( يحتسى بضع قطرات من الشاى )

تشربى ايه ؟



انا: لا شكرا بالهنا والشفا ...الف سلامة على حضرتك ( كل ده وانا مبتسمة )


لقيت صوت عجيب جدا جوايا بيقول :

مطرح ما يسرى يهرى الهى  ربنا يزيدك مرض يا بعيد



O.o

يا للهول !!! مين اللى بيتكلم ؟


......... و فضلت على وشى نظرة اسبهلال

هو : اتفضلى الورق كله تمام اهو اى خدمات ؟؟

انا : و مازلت مسبهلة ..... شكرا

وخرجت من المكتب




ومازلت انظر فى الفضاء الواسع و فمى فاغر بلا ادنى شعور منى
( حلوة فاغر دى :) )


و بعدين ركزت اوى
هو مين اللى قال كدة بجد ؟؟



ردت عليا نفسى الامارة بالسوء : انا فى حــاجة ؟ :@


نفسى المسبهلة :  وليه كدة طيب ؟

الامارة : هو ايه اللى ليه ده حلال فيه ابن اللذين آمنوا ده ، انتى نسيتى انه مطلع عنينا كلنا و مافى حد بيحبه

المسبهلة : بس كدة ما يصحـــ.....

الامارة : اسكتى و انتى خايبة كدة
هو فى ايه وانا شتمته انا دعيت عليه بس وربنا قادر يهده هو و امثاله

المسبهلة بعد ان استكانت : طيب


و عدى اليوم 

مر الاربعاء  و عرفت انه ازداد مرض على مرضه و الى حد ما انشكحت


الخميس
بدأ بداية مشرقة جميلة باستنشاق نسيم الصباح العليل و سماع اغاريد الطيور
وصلت الشغل
بدأت  كلام مع الحضور
و استمريت لمدة ساعة باتكلم بصوت واضح و سليم

و هـــــــــــــــــوب

الصوت فصل

احمــ احمــ ... مارجعش
شربت نعناع دافى..... مارجعش

استسلمت للضياع لحد نهاية اليوم

وروحت البيت اجتهادا بادويتى و ساءت الحالة




ولما امعنت التفكير  هان عليا المرض  و حمدت ربنا عليه
فرصـــة يكفّـر سيئــاتى و بالذات  الشمـــــــــــــــــــاتـــة

عمر ما كان من طبعى الشماتة ولا التشفى فى حد
فعلياَ فى ناس بيضطرونا اننا نكرهم
مش هأقدر اعدل منهم

لكن نفســـى .... ازاى اسمح لهم انهم يوصلونى لدرجة الكُره و الشماتة !!!

و ازاى اسمح انه ياخد من حسناتى دون وجه حق !



فى يوم عرفــة

اسأل الله ان يغفر لى و يبدل سيئاتى حسنات و يطـــهر قلبــــــــــــــــى

و ان يشفيه و يبدله سيئاته حسنات  و يؤجره اجر صيامى يوم عرفة




و فى النهاية

عيدكم سعيد





هناك 4 تعليقات:

  1. فعلا يا شوري .. إياكَ أن تظهر الشماتة بأخيك فيعافيه الله ويبتليك

    ألف سلامة يا عم .. كفارة
    تعملش كده تاني بقى -_-

    عشانك انت مش عشان أي حد يعني

    ردحذف
  2. مع انه حديث ضعيف فى سلسلة الالبانى يا هوبا
    الا انه فعلا صحيح

    والحمد لله انى من الناس اللى ربنا بيبن لهم غلطهم اول بأول ، مش بيسيبنى بجبروتى فى الارض

    الله يسلمك و عيدك جميل يارب

    ردحذف
  3. جبروتك فى الارض D:

    انت غلبان متستحملش نتيجة الشماتة

    خليك فى حالك احسن وصفى نيتك ((

    كارت جوا باقة ورد مش احمر بتقولك سلامتـك

    <3

    M

    ردحذف
  4. :(
    خلاص توبنا الى الله بقى
    ميرسى على المعايدة

    S

    ردحذف