الى طى النسيان 2009




قال الامام الشافعى رحمــه الله :

نعيب زماننا والعيـب فينـا *** وما لزماننا عيـب ســوانـا
ونهجوا ذا الزمان بغير ذنبٍ *** ولو نطق الزمان لنا هجانـا
وليس الذئب يأكل لحم ذئبٍ *** ويأكل بعضنا بعضنا عيانـا







كلام صحيح 100 %

مع انى متأكدة ان العصر الى عاشه إمامنا الكريم لا يشبه ابدا عصرنا الحالى خصوصا
نـــاسه



كل سنة وفى نفس الوقت بنقــول نفس الكلام
"
اخيرا السنة دى خلصت ، اعوذ بالله دى كانت فقر ، يا ســااااااااااااتر دى كانت طويلة طول ، لا وكان كلها سواد "


يا سلام !!

طيب عينى فى عينكم كدة

بقى هى السنة الى كان فيها المشكلة ؟
هى الى فقر و اعوذ بالله منها ؟

يعنى مش من الى عايشين فيها ، كلهم ابرياء من ذنبها براءة الذئب من دم بن يعقوب

لا بقى ده احنا نبقى ظالمين ، و مفتريين اوى

هى 2009 كانت عملت ايه ، كل ذنبها انها جت

افكركم جت ازاى ؟








happy new year"

happy 2009

سنة سعيدة عليكوا "

و احتفالات و ماسجات و ايميلات ، و تليفونات ، مين قال هات .... ،
وطبل و زمر و شخاليل و زغاريط و لا كأنه فرح ابن العمدة

احلام وردية و فوشيا كمان ، كأن ليلة القدر هتستمر 12 شهر معانا

و كل واحد يشوف حظه ايه فى السنة الجديدة ، و طموحاته الى كلها هتتحقق ، و المصباح السحرى و العفريت الى هيلاقيهم

لحد اول ازمة تقابله يبدأ شعـــار " دى سنة @#%$^&* و تييييييييييت "


و تخلص 2009 الحزينة على حالها و تمشى و هى مش شايفة من دموعها من كل الى اتقال عليها ، ومن احباطنا فيها و تحلف لو قابلت 2010 فى السكة تقولها ماتروحيش دول ناس جاحدة ، و لو ضرورى يبقى نكدى عليهم و انتقمى لى منهم






و تيجى 2010 و نقيم الافراح و الليالى الملاح ، و نبنى الاحلام والاوهام و هكـــذا .....



من فضلكم استوعبوا ان الزمن هو الزمن و
انتبهـــــــوا


" لا تسبوا الدهر فإن الله هو الدهر " رواه مسلم عن ابى هريرة


ركزوا و دققوا فى البشر و هتعرفوا المشكلة فيـــن

و دُمتــم بود


و كل 2010 و انتم طيبين , و ربنا يجعلها سنة سعيدة عليكم و تحققوا كل الى بتتمنوه فيها
;)












هناك تعليقان (2):

  1. كل سنة وانت امور يامعلم

    يارب 2010 تبقي احلى يارب

    مفيش فى ايدينا غير اننا نقول يارب اللى جاى يبقي احسن

    والناس مش قصدهم ان السنة نفسها اللى وحشة ... احنا بس بنبقي قاصدين ان احداثها كانت زبالة .. بس يعني
    D:

    واحشنى ياواد

    ردحذف
  2. و انت أأمر يا ريس

    :)

    يارب سنة حلوة على كل الناس

    ردحذف